Արևելագիտության ինստիտուտի տնօրեն Ռուբեն Սաֆրաստյանի կարծիքով՝ Թուրքիայում տեղի ունեցող զանգվածային ձերբակալությունների, մարդու իրավունքների ոտնահարումների վերաբերյալ Եվրամիության գնահատականները պետք է, որ շատ ավելի կոշտ լինեին: Tert.am-ի հետ զրույցում նա նկատեց, որ հիմնականում լինում են անհատական քննադատություններ, բայց ընդհանուր առմամբ, որպես կառույց, ԵՄ–ն չի արտահայտում իր դիրքորոշումը:

«Ես կարծում եմ, որ առաջիկա տարիներին էլ Եվրամիությունը կփորձի կտրուկ քայլերի չդիմել Թուրքիայի հարցում, կշարունակի Թուրքիային պահել Եվրամիության հետ շփման մեջ»,- ասաց նա:

Դիտարկմանը, թե Եվրամիությունից պատճառաբանում են, որ Թուրքիա ուղղորդվող ֆինանսական օգնությունը փախստականների և մարդու իրավունքներով զբաղվող կազմակերպությունների համար է, չեն ցանկանում, որ նրանք զրկվեն ֆինանսական օժանդակությունից, Ռուբեն Սաֆրաստյանը պատասխանեց, որ դա պատճառներից միայն մեկը կարող է լինել:

«Չպետք է մոռանալ, որ Թուրքիան ՆԱՏՕ-ի անդամ է, հարաբերություններ ունի Եվրամիության մի շարք երկրների հետ, և նրանք ամեն կերպ կփորձեն Թուրքիային իրենցից շատ հեռու չթողնել:  Էրդողանի քաղաքականությունը Եվրոպայում դժգոհություն է առաջացնում, բայց չեմ կարծում, որ Եվրոպան կոշտ դիրքորոշում կհայտնի»,- ասաց նա:
Ռուբեն Սաֆրաստյանը համաձայնեց դիտարկման հետ, թե ՆԱՏՕ-ն ու Եվրամիությունը նաև որոշ չափով զսպաշապիկ են Թուրքիայի համար, ըստ նրա՝ այդ կառույցների կողքին մնալը  Թուրքիային կարող է հեռու պահել ծայրահեղ քայլերի դիմելուց, ավելի ագրեսիվ լինելուց:

Անդրադառնալով Թուրքիայի ներքին կյանքում տեղի ունեցողի նկատմամբ հասարակական տրամադրություններին՝ Ռուբեն Սաֆրաստյանը նշեց, որ դժվար էլ այստեղ լուրջ ընդվզումներ լինեն:

«Իմ կարծիքով՝ հեղաշրջման փորձից հետո Էրդողանի վարկանիշը բարձրացավ, և նրա ձեռքերն արդեն ազատ են, նա կարողանում է անել այն, ինչը որ ուզում է, և որևէ քաղաքական կամ հասարակական ընդվզման նա չի սպասում: Իհարկե, Քրդստանի բանվորական կուսակցությունը կփորձի պատասխան տալ, բայց դրանք լայն արձագանք չեն ստանա: Էրդողանի ներկայիս վարչակազմը կարողանում է անել այն, ինչ-որ ցանկանում է»,- ասաց նա՝ նկատելով, որ այդ ճնշումները նրա համար են, որ Էրդողանին որևէ այլընտրանք չլինի:

Թուրքիայում կատարվողը՝ ձերբակալությունները, ճնշումները տարբեր խմբերի նկատմամբ, անհանգստություն են ստեղծում նաև հայ համայնքի մոտ, որը, ըստ թուրքագետի, հասկանալի է: «Նրանց մտավախությունները բխում են պատմական դառը փորձառությունից: Եթե Թուրքիայում տեղի են ունենում նմանատիպ իրադարձություններ, տուժում են նաև հայերը»,- ասաց նա՝ հավելելով, որ համայնքը այսպիսի իրավիճակներում կողմնորոշվում է արդեն իր տարիների փորձով:

Նա հիշեց`2003-ին, երբ Ֆրանսիան ընդունեց Հայոց ցեղասպանությունը ճանաչող բանաձևը, Թուրքիան իր քաղաքականությունը կոշտացրեց Հայաստանի նկատմամբ՝ պարտադրելով, որ այստեղից Թուրքիա գնացող քաղաքացիները թուրքական հյուպատոսարաններով անցնեն:

«Հայերը ճամպրուկները պատրաստ սպասում էին, թե կարող է զանգվածային ճնշումներ լինեին համայնքի վրա և հնարավոր լիներ լքել Թուրքիան: Ես համոզված եմ, որ համայնքը մեծ փորձառություն ունի և գիտի, թե ինչպես դուրս գալ այդպիսի իրավիճակներից»,– ասաց նա:

Աղբյուր՝  Tert.am

allTurkey.am